fbpx Skip to main content Skip to search

Archives for მარტი 2020

სესხის გადავადება – შეღავათი თუ ზედმეტი ხარჯი

ქვეყანაში ახალი კორონავირუსის COVID-19-ის გავრცელების გამო შექმნილი მდგომარეობისა და მოსალოდნელი რისკების გათვალისწინებით, საქართველოს რამდენიმე კომერციულმა ბანკმა, მომხმარებელს სამთვიანი საშეღავათო პერიოდით სარგებლობა შესთავაზა. თუმცა, ეს შესაძლებლობა თქვენთვის შეიძლება სულაც არ წარმოადგენდეს შეღავათს და საბოლოოდ ზედმეტი ხარჯის გაღება აღმოჩნდეს.

კომერციული ბანკების განცხადებით, სესხების გადავადებით სარგებლობა ნებაყოფლობითია და მსესხებლის სურვილზეა დამოკიდებული. ამიტომ, აუცილებელია, სანამ დათანხმდებით ბანკ(ებ)ის მიერ შემოთავაზებულ პირობებს, კარგად განსაზღვროთ თქვენი რისკები, შემოსავლებისა და ხარჯების ოდენობა, მომავალ თვეებში თქვენი გადახდისუნარიანობის საკითხი და მხოლოდ ამის შემდეგ გადაწყვიტოთ არის თუ არა თქვენთვის „მომგებიანი“ საშეღავათო პერიოდით სარგებლობა.

ჩვენ კი დაგეხმარებით, თითოეული ბანკის მიერ შემოთავაზებული პირობების ანალიზით, უფრო მარტივი გავხადოთ თქვენთვის გადაწყვეტილების მიღების პროცესი.

საქართველოს ბანკი

საქართველოს ბანკი საშეღავათო პერიოდით სარგებლობის შესაძლებლობას სთავაზობს ფიზიკურ პირებს ყველა სახის სესხზე, იქნება ეს იპოთეკა, სამომხმარებლო სესხი, განვადება თუ საკრედიტო ბარათი. ამასთან, საშეღავათო პერიოდი ვრცელდება ნებისმიერ ვალუტაში გაცემულ სესხებზე.

სამთვიანი საშეღავათო პერიოდის განმავლობაში ფიზიკურ პირებს არ მოუწევთ არც სესხის ძირისა და არც პროცენტის გადახდა, თუმცა აუცილებლად გასათვალისწინებელ ფაქტორს წარმოადგენს შემდეგი: თანხის გადახდას იწყებთ ივნისიდან და შესაბამისად, თქვენი სესხის გადახდის ვადა ხანგრძლივდება საშეღავათო პერიოდით – სამი თვით. ამის გათვალისწინებით, იზრდება თქვენ მიერ სესხით სარგებლობისათვის გადასახდელი პროცენტის ოდენობა.

განვიხილოთ შემდეგი მაგალითი:

თქვენ გაქვთ სესხი, რომელიც არსებული გრაფიკის გათვალისწინებით,  უნდა დამთავრდეს 2020 წლის დეკემბერში. სესხის ხელშეკრულების მიხედვით, თქვენ იხდით პროცენტის სახით 700 ლარს ყოველთვიურად.

თუ თქვენ ისარგებლებთ საშეღავათო პერიოდით, თქვენი სესხის დამთავრების თარიღი იქნება 2021 წლის მარტი. თქვენ მიერ ზედმეტად გადასახდელი თანხა კი 3×700=2100 ლარი, რომელიც გადანაწილდება სესხის დაფარვამდე დარჩენილ თვეებზე, ამ შემთხვევაში 10 თვეზე (2020 წლის ივნისიდან 2021 წლის მარტის ჩათვლით). შესაბამისად, თქვენ მიერ ყოველთვიურად გადასახდელი თანხა გაიზრდება 2100:10=210 ლარით.

თიბისი ბანკი

თიბისი ბანკის საშეღავათო პერიოდი ვრცელდება როგორც ფიზიკურ, ისე იურიდიულ პირებზე. რაც შეეხება პროდუქტთა ჩამონათვალს, რომელსაც საშეღავათო პერიოდი შეეხება, ესენია: იპოთეკური, სამომხმარებლო, სასწრაფო სესხები, ავტო სესხები, განვადება, საკრედიტო ბარათები, ოვერდრაფტი, ლომბარდი და სტანდარტული გრაფიკის მქონე ბიზნეს და აგრო სესხები.

საქართველოს ბანკის მსგავსად, სესხის ვადა საშეღავათო პერიოდით (3 თვით) ხანგრძლივდება თიბისი ბანკის შემთხვევაშიც. პროცენტის დარიცხვის პრინციპი აღნიშნულ ბანკშიც იგივეა, რაც ნიშნავს იმას, რომ საშეღავათო პერიოდის განმავლობაში სესხის ძირითად თანხაზე გაგრძელდება პროცენტის დარიცხვა, რომლის გადანაწილება მოხდება საშეღავათო პერიოდის შემდგომ, სესხის დარჩენილ ვადაზე. პროცენტზე პროცენტის დარიცხვა კი არ მოხდება.

თიბისი ბანკის მომხმარებელ პიზიკურ პირებს რამდენიმე სესხის არსებობის შემთხვევაში არ ექნებათ შესაძლებლობა აირჩიონ, რომელი სესხის ფარგლებში ისარგებლებენ საშეღავათო პერიოდით. საშეღავათო პერიოდი ამოქმედდება ან ყველა საკრედიტო პროდუქტზე, ან მომხმარებლის უარის შემთხვევაში – არც ერთზე.

რაც შეეხება ბიზნეს სესხებსა და სტატუს მომხმარებლებს, მათ შემთხვევაში მოხდება თითოეული სესხის ინდივიდუალურად განხილვა.

თიბისი ბანკის მიერ შემოთავაზებული პირობების თანახმად, მომხმარებლებს, ვინც ისარგებლებს საშეღავათო პერიოდით, ექნება შესაძლებლობა ყოველთვიური გადასახდელი თანხის ფარგლებში განახორციელოს წინსწრებით გადახდა, რომელზეც მას საკომისიო არ დაერიცხება. საშეღავათო პერიოდის დასრულების შემდეგ კი წინსწრებით გადახდაზე საკომისიოს დარიცხვის შესახებ კონტრაქტით გათვალისწინებული პირობების მოქმედება აღდგება.

 

ლიბერთი ბანკი

ლიბერთი ბანკის გადაწყვეტილებით, 3-თვიანი საშეღავათო პერიოდით სარგებლობის შესაძლებლობა აქვს ყველა ფიზიკურ პირს, ვინც სარგებლობს ლიბერთი ბანკის არაუზრუნველყოფილი და უზრუნველყოფილი ტიპის სესხებით: სამომხმარებლო სესხი, იპოთეკური სესხი, ოვერდრაფტი, საკრედიტო ბარათები, განვადება, სოციალური სესხები, ფიზიკურ პირებზე გაცემული სამეწარმეო სესხები, ოქროთი უზრუნველყოფილი სესხი და ავტომობილით უზრუნველყოფილი სესხი.

ლიბერთი ბანკის საშეღავათო პერიოდი ითვალისწინებს საქართველოს ბანკისა და თიბისი ბანკისგან განსხვავებულ პირობებს სესხის ვადისა და პროცენტის დარიცხვის ნაწილში. კერძოდ, ლიბერთი ბანკის მომხმარებლებს საშეღავათო პერიოდით სარგებლობის შემთხვევაში სესხის ვადა არ გაუხანგრძლივდებათ, სამ თვეში გადასახდელი პროცენტი კი გადანაწილდება დარჩენილ თვეებზე.

მაგალითისთვის, თქვენ გაქვთ სესხი, რომელიც არსებული გრაფიკის გათვალისწინებით,  უნდა დამთავრდეს 2020 წლის დეკემბერში. სესხის ხელშეკრულების მიხედვით, თქვენ იხდით პროცენტის სახით 700 ლარს ყოველთვიურად.

თუ თქვენ ისარგებლებთ საშეღავათო პერიოდით, თქვენი სესხის დამთავრების თარიღი იქნება კვლავ 2020 წლის დეკემბერი. თქვენ მიერ ზედმეტად გადასახდელი თანხა კი 3×700=2100 ლარი, რომელიც გადანაწილდება სესხის დაფარვამდე დარჩენილ თვეებზე, ამ შემთხვევაში 7 თვეზე (2020 წლის ივნისიდან 2020 წლის დეკემბრის ჩათვლით). შესაბამისად, თქვენ მიერ ყოველთვიურად გადასახდელი თანხა გაიზრდება 2100:7=300 ლარით.

 

ვითიბი ბანკი

ვითიბი ბანკი საშეღავათო 3-თვიან პერიოდს ავრცელებს ყველა ფიზიკურ პირზე, გარდა იმ მსესხებლებისა, რომლებიც 2020 წლის 16 მარტის მდგომარეობით იმყოფებიან 45 ან მეტ დღიან ვადაგადაცილებაში. რაც შეეხება ფიზიკურ და იურიდიულ პირებს, რომლებიც სარგებლობენ ბიზნეს სესხებით, მათ ბანკი დაუკავშირდება გადავადების ინდივიდუალური პირობების შესათანხმებლად.

ვითიბი ბანკის საშეღავათო პერიოდი ეხება შემდეგ პროდუქტებს: სამომხმარებლო სესხები, იპოთეკური სესხები, ავტოსესხები, განვადებები, სალომბარდე სესხები, საკრედიტო ბარათები, სახელფასო ოვერდრაფტები. შენატანების გადავადება კი არ შეეხება დეპოზიტით უზრუნველყოფილ სესხებს.

სხვა ბანკებისაგან განსხვავებით, ვითიბი ბანკში მომხმარებლები საშეღავათო პერიოდით სარგებლობის შემთხვევაში, საშეღავათო პერიოდის დასრულების შემდეგ სესხს დაფარავენ ყოველთვიურად, არსებული გრაფიკის შესაბამისად. სესხის ვადა გახანგრძლივდება, თუმცა გახანგრძლივებულ პერიოდში მომხმარებლები გადაიხდიან მხოლოდ საშეღავათო პერიოდში დარიცხულ პროცენტს. შესაბამისად, აღნიშნული პროცენტი დარჩენილ თვეებზე არ გადანაწილდება ისე, როგორც სხვა ბანკებში.

მაგალითად, თქვენ გაქვთ სესხი, რომელიც არსებული გრაფიკის გათვალისწინებით,  უნდა დამთავრდეს 2020 წლის დეკემბერში. სესხის ხელშეკრულების მიხედვით, თქვენ იხდით პროცენტის სახით 700 ლარს ყოველთვიურად.

თუ თქვენ ისარგებლებთ საშეღავათო პერიოდით, თქვენი სესხის დამთავრების თარიღი იქნება 2021 წლის მარტი. 2020 წლის ივნისიდან 2021 წლის მარტამდე თქვენ გადაიხდით სესხის ძირსა და მასზე დარიცხულ პროცენტს არსებული გრაფიკის შესაბამისად. თქვენ მიერ ზედმეტად გადასახდელი თანხა – საშეღავათო პერიდზე დარიცხული პროცენტი იქნება 3×700=2100 ლარი, რომელსაც თქვენ გადაიხდით სესხის დასრულების თარიღის, 2021 წლის მარტის, შემდეგ, რომელიც გადანაწილდება პირობითად 2 თვეზე, შესაბამისად, 2021 წლის აპრილში და მაისში თქვენ მოგიწევთ თვეში 2100/2=1050 ლარის გადახდა.

 

ვითიბი ბანკში მომხმარებელს არ ექნება შესაძლებლობა რომელიმე სესხზე გააუქმოს გადავადება, შესაბამისად, გადავადება უნდა შეეხოს ყველა სესხს ან არცერთ მათგანს. მომხმარებლის მიერ რომელიმე ერთ ან ყველა სესხზე შენატანის წინსწრებით განხორციელების შემთხვევაში, მას არ მოუწევს წინსწრების საკომისიოს გადახდა შენატანის სამმაგი ოდენობის ფარგლებში.

 

ბაზისბანკი

ბაზისბანკი 3-თვიანი საშეღავათო პერიოდით სარგებლობის შესაძლებლობას აძლებს ფიზიკურ პირებს, რომელთაც ბანკის მიმართ არ აქვთ პრობლემური ვალდებულება და უწევთ სესხზე შენატანის განხორციელება 16 ივნისამდე.

საშეღავათო პერიოდი ვრცელდება შემდეგ პროდუქტებზე: იპოთეკური, არაუზრუნველყოფილი და უზრუნველყოფილი სამომხმარებლო სესხები, განვადება, სწრაფი ფული, განავადე და მზა სესხი – ონლაინ სესხი.

სხვა ბანკების მსგავსად, ბაზისბანკშიც საშეღავათო პერიოდის განმავლობაში სესხის ძირითად თანხაზე გაგრძელდება პროცენტის დარიცხვა, თუმცა, ბაზისბანკში სესხი გახანგრძლივდება იმ ვადით, რომელიც უზრუნველყოფს იმას, რომ მომხმარებლისთვის არ გაიზარდოს ყოველთვიური შენატანი. შესაბმისად, ბაზისბანკში საშეღავათო პერიოდი იმოქმედებს ვითიბი ბანკში შემუშავებული პრინციპის მსგავსად.

გაეცანით თქვენი ბანკის მიერ შემოთავაზებულ პირობებს, განსაზღვრეთ რისკები თქვენი სამომავლო შემოსავლის გათვალისწინებით და მხოლოდ ამის შემდეგ მიიღეთ გადაწყვეტილება, გიღირთ თუ არა საშეღავათო პერიოდით სარგებლობა.

იურიდიული დეპარტამენტის ხელმძღვანელი: ფლორენსია კაშხჩიანი

Read more

ბიზნესსაქმიანობის შეზღუდვა და საგადასახადო შეღავათები საგანგებო მდგომარეობის ფარგლებში

საქართველოში ახალი კორონავირუსის (COVID-19) გავრცელებისა და ქვეყანაში შექმნილი ვითარების გამო 2020 წლის 21 მარტს საქართველოს მთავრობამ საქართველოს პრეზიდენტს, სალომე ზურაბიშვილს, მთელი ქვეყნის მასშტაბით ერთი თვის ვადით საგანგებო მდგომარეობის შემოღების ინიციატივით მიმართა. პრეზიდენტმა ქვეყანაში საგანგებო მდგომარეობის გამოცხადების შესახებ მიიღო გადაწყვეტილება, რომელიც ძალაში გამოცხადებისთანავე შევიდა. იმავე დღეს საქართველოს პარლამენტმა საგანგებო სხდომაზე 115 ხმით არცერთის წინააღმდეგ საგანგებო მდგომარეობის შესახებ პრეზიდენტის მიერ გამოცემულ დეკრეტს მხარი დაუჭირა.

აღნიშნულის საფუძველზე 2020 წლის 23 მარტს საქართველოს მთავრობამ მიიღო დადგენილება N181 საქართველოში ახალი კორონავირუსის გავრცელების აღკვეთის მიზნით გასატარებელი ღონისძიებების დამტკიცების შესახებ, რომლითაც დაწესდა გარკვეული შეზღუდვები ბიზნესსაქმიანობაზე.

ბიზნესსაქმიანობის შეზღუდვა

საგანგებო მდგომარეობის ვადით, 2020 წლის 21 აპრილამდე, შეჩერდა ნებისმიერი საქონლის/პროდუქტის მიწოდება/რეალიზაცია. განისაზღვრა საგამონაკლისო სია, რომელზეც არ ვრცელდება აღნიშნული შეზღუდვა. კერძოდ, არ იკრძალება:

  • სურსათის/ცხოველის საკვების, ცხოველის, ცხოველური და მცენარეული პროდუქტების, საყოფაცხოვრებო ქიმიისა და ჰიგიენის, ვეტერინარული პრეპარატების, პესტიციდებისა და აგროქიმიკატების, სათესლე და სარგავი მასალების საცალო რეალიზაცია;
  • ელექტროკომუნიკაციის, ელექტროენერგიის, ბუნებრივი გაზის, წყლის, ბენზინის, დიზელის, თხევადი აირის მიწოდება;
  • სამედიცინო დანიშნულების საქონლის, ფარმაცევტული პროდუქტის რეალიზაცია;
  • საქონლის/პროდუქტის საცალო/საბითუმო მიწოდება/რეალიზაცია, თუ საცალო მიწოდება/რეალიზაცია ხორციელდება ადგილზე მიტანის მომსახურებით, ხოლო საბითუმო მიწოდება/რეალიზაცია ხორციელდება ადგილზე მიტანის მომსახურებით ან ადგილიდან გატანით მომხმარებლის სარეალიზაციო სივრცეში დაშვების/წვდომის გარეშე;
  • პრესის ჯიხურების საქმიანობა.

შეზღუდვები შეეხოთ რესტორნებსა და კვების ობიექტებსაც, რომელთათვისაც ბიზნესსაქმიანობის განხორციელება დასაშვებია მხოლოდ ადგილზე მიტანის ან პროდუქტის სატრანსპორტო საშუალებით გატანის (ე.წ. „დრაივის“) მომსახურებით, სარეალიზაციო სივრცეში მომხმარებლის დაშვების გარეშე.

საგანგებო მდგომარეობის ვადით შეჩერდა საკლუბო და გასართობ-დასასვენებელი ცენტრების, კინოთეატრების, სპორტულ-გამაჯანსაღებელი ცენტრების, სილამაზის სალონებისა და ღამის კლუბების საქმიანობა. საგანგებო მდგომარეობის ვადით, აზარტული და მომგებიანი თამაშობების მომსახურების მიწოდება, დასაშვებია მხოლოდ ელექტრონული ფორმით.

 

თავშეყრის აკრძალვა და სოციალური დისტანციის დაცვის ვალდებულება

ყველა დანარჩენ ბიზნესსუბიექტს უფლება აქვს გააგრძელოს საქმიანობა, თუმცა ამავე დადგენილებით გათვალისწინებული შეზღუდვების ფარგლებში. კერძოდ, დადგენილების 5.2. მუხლის თანახმად, იკრძალება საჯარო სივრცეში ფიზიკურ პირთა თავშეყრა 10 პირზე მეტი რაოდენობით. განმარტებულია საჯარო სივრცის ცნებაც, რომლის მიხედვითაც საჯარო სივრცე არის როგორც ჭერქვეშ, ისე გარეთ არსებული ნებისმიერი ადგილი, თუ იგი არ წარმოადგენს კერძო პირთა საცხოვრებელი მიზნებისთვის გამოსაყენებელ ადგილს.

10-ზე მეტი ფიზიკური პირის თავშეყრა, მათ შორის, იმ კერძო დაწესებულებებში, რომელთა მიმართაც არ ვრცელდება საქმიანობის შეჩერების მოთხოვნა, დასაშვებია ობიექტის სპეციფიკის გათვალისწინებით არანაკლებ 2 მეტრის სოციალური დისტანციის დაცვით. აღსანიშნავია, რომ საქართველოს მთავრობის მიერ ყველა ბიზნესსუბიექტზე გაცემულია რეკომენდაცია, საქმიანობის დისტანციურ რეჟიმში გაგრძელების შესახებ.

10-ზე მეტი ფიზიკური პირის თავშეყრის შესახებ შეზღუდვა არ ეხება:

  • სამედიცინო დაწესებულებებში, საჯარო დაწესებულებებში, თავდაცვის ძალებში, სპეციალურ პენიტენციურ დაწესებულებებში, სამართალდამცავ ორგანოებში პირთა თავშეყრას მათზე დაკისრებული ფუნქციების შესრულების მიზნით;
  • საზოგადოებრივ ტრანსპორტს, თუ მათზე არ ვრცელდება საგანგებო მდგომარეობის დროს საქმიანობის შეჩერების მოთხოვნა;
  • სამშენებლო-ინფრასტრუქტურული სამუშაოების შესრულებას.

 

საგადასახადო შეღავათები

საქართველოს მთავრობის მიერ მიღებული გადაწყვეტილების შესაბამისად, დაწესდა საგადასახადო შეღავათები გადასახადის გადამხდელთა ორი კატეგორიისათვის:

  1. ბიზნესსუბიექტებისათვის, რომლებიც საქმიანობენ ტურისტულ სექტორში;
  2. ბიზნესსუბიექტტებისათვის, რომელთაც შეჩერებული აქვთ საქმიანობა ქვეყანაში გამოცხადებული საგანგებო მდგომარეობის გათვალისწინებით.

მთავრობის გადაწყვეტილების მიხედვით, ამ პირებს ეძლევათ შესაძლებლობა, 4 თვის ვადით, 2020 წლის 1 ნოემბრამდე, გადაივადონ დეკლარირებული საგადასახადო ვალდებულებები საშემოსავლო და ქონების გადასახადის ნაწილში.

აღნიშნული შეღავათით სარგებლობისათვის ბიზნესსუბიექტებმა შემოსავლების სამსახურის ვებგვერდზე უნდა წარადგინონ შესაბამისი განაცხადის ელექტრონული ფორმა, დასტურის მიღების შემდეგ კი მათ ექნებათ შეღავათით სარგებლობის უფლება.

შეღავათი ეხება საშემოსავლო და ქონების გადასახადის დეკლარაციებს, რომელთა წარმოდგენაც მოხდება მარტის, აპრილის, მაისის და ივნისის თვეებში.

საგადასახადო შეღავათით სარგებლობისათვის ბიზნესსუბიექტებმა უნდა შეავსონ ელექტრონული განცხადების ფორმა, რომელიც მოცემულია შემდეგ ბმულზე: https://eservices.rs.ge/ServiceRequestNew.aspx?p=721.

განაცხადის ფორმის შევსების წესი კი შეგიძლიათ იხილოთ მოცემულ ბმულზე: https://www.rs.ge/common/get_doc.aspx?id=10806.

Read more

რა გავითვალისწინოთ ბიზნესის რეგისტრაციიასას? – შეცდომა, რომელიც არ უნდა დავუშვათ

ბიზნეს საქმიანობის დაწყებისას თითოეული ინდივიდის მიზანს შემოსავლის მიღება წარმოადგენს, თუმცა არ უნდა დაგვავიწყდეს საგადასახადო და სამართლებრივი საკითხები, რომელთა უგულებელყოფამ შესაძლოა მნიშვნელოვანი ზიანი მიაყენოს თქვენს სამომავლო ბიზნესს.

პირველ რიგში, გასათვალისწინებელია, რომ საქართველოს მოქმედი კანონმდებლობა ბიზნეს სუბიექტებს უწესებს რეგისტრაციასთან დაკავშირებულ იმპერატიულ (სავალდებულო) მოთხოვნას. კერძოდ, „მეწარმეთა შესახებ“ საქართველოს კანონის 4.1. მუხლის შესაბამისად, „ამ კანონის მე-2 მუხლით განსაზღვრული მეწარმე სუბიექტის [ინდივიდუალური მეწარმე, სოლიდარული პასუხისმგებლობის საზოგადოება (სპს), კომანდიტური საზოგადოება (კს), შეზღუდული პასუხისმგებლობის საზოგადოება (შპს), სააქციო საზოგადოება (სს, კორპორაცია) და კოოპერატივი] მეწარმეთა და არასამეწარმეო (არაკომერციული) იურიდიული პირების რეესტრში რეგისტრაცია სავალდებულოა“.  აღსანიშნავია, რომ საქართველოს საგადასახადო კოდექსი ასევე ითვალისწინებს მიკრო ბიზნესის, მცირე ბიზნესის ან ფიქსირებული გადასახადის გადამხდელის სტატუსის მქონე პირების რეგისტრაციასაც, რომლებზეც ვრცელდება სპეციალური დაბეგვრის რეჟიმები.

ფინანსური გადაწყვეტილებების ჯგუფიბიზნეს კონსულტაციის ფარგლებში დამწყებ მეწარმეებს ეხმარება მათი საქმიანობის სფეროს, ბიზნესის მასშტაბის, მოსალოდნელი წლიური შემოსავლის, შესაძლო საგადასახადო ვალდებულებების, სამომავლო რისკებისა და სხვა მრავალი ფაქტორის გათვალისწინებით შეარჩიონ ყველაზე ოპტიმალური სამართლებრივი ფორმა ბიზნესის რეგისტრაციისათვის.

აღსანიშნავია, რომ დამწყებ მეწარმეებს  საქმიანობის დაწყებამდე ბიზნეს კონსულტაციასთან ერთად ესაჭიროებათ სამართლებრივი დახმარება სამეწარმეო სამართლის კუთხით, რათა თავიდან აირიდონ მომავალში პარტნიორთა შორის უთანხმოება, სასამართლო დავები, დროისა და ფინანსური რესურსების ხარჯვა, კომპანიის რეპუტაციის შელახვა და სხვა.

სამართლებრივი დახმარება, პირველ რიგში, საჭიროა ბიზნესის რეგისტრაციისათვის აუცილებელი სწორი და შესაბამისი დოკუმენტაციის მოძიების, შეგროვებისა და შედგენისათვის.

საწარმოს რეგისტრაციისას განსაკუთრებული მნიშვნელობა ენიჭება ბიზნესის დამფუძნებელთა მიერ ხელმოწერილ და სათანადო წესით დამოწმებულ წესდებას. დამწყები მეწარმეების შეცდომას წარმოადგენს სწორედ ის, რომ ბიზნესის რეგისტრაციისას, როგორც წესი, ისინი იყენებენ საჯარო რეესტრის ეროვნული სააგენტოს მიერ შემოთავაზებული წესდების შაბლონს, რომელიც შედგენილია „მეწარმეთა შესახებ“ საქართველოს კანონის დისპოზიციურ ნორმებზე დაყრდნობით. დისპოზიციურ ნორმათა სამართლებრივი ბუნება მდგომარეობს იმაში, რომ მის მიერ დადგენილი წესი შესაძლოა შეიცვალოს (ამ შემთხვევაში) ბიზნესის დამფუძნებელთა შეთანხმებით, რომლებიც ჩამოაყალიბებენ მათთვის სასურველ წესებს, რომლებიც არ ეწინააღმდეგება საქართველოს იმპერატიულ კანონმდებლობას. დამფუძნებელთა მიერ ამ შესაძლებლობის გამოუყენებლობის შემთხვევაში, მათი ბიზნესის მართვის ფარგლებში იმოქმედებს „მეწარმეთა შესახებ“ საქართველოს კანონის დებულებები. ამით კი თქვენ დაკარგავთ შესაძლებლობას, მართოთ თქვენი ბიზნესი თქვენი სურვილების შესაბამისად. მაგალითისთვის, კანონი განსაზღვრავს, რომ „თუ წესდებით სხვა რამ არ არის დადგენილი, სააქციო საზოგადოებაში, შეზღუდული პასუხისმგებლობის საზოგადოებასა და კოოპერატივში შერწყმის შესახებ გადაწყვეტილების მისაღებად საჭიროა დამსწრე ხმის უფლების მქონე პარტნიორის (პარტნიორთა) ხმების 75%“. თქვენ კი თქვენი ბიზნეს საქმიანობის, პარტნიორთა რაოდენობის და მათ შორის წილების განაწილების გათვალისწინებით შეგიძლიათ განსაზღვროთ კანონისგან განსხვავებული, თქვენთვის სასურველი საპროცენტო განაკვეთი ხმებისთვის, რომელიც საჭირო იქნება საწარმოს რეორგანიზაციის შესახებ გადაწყვეტილების მიღებისათვის. აღნიშნული კი, აუცილებლად სათანადო წესით უნდა აისახოს საწარმოს წესდებაში.

როგორც წესი, ადამიანები საქმიან ურთიერთობაში შედიან მათთვის სანდო პირებთან. ისინი შეცდომას სწორედ ამის გამო უშვებენ და ბიზნესის დაფუძნების ეტაპზე ვერ ხედავენ სამართლებრივი გარანტიებით შედგენილი, დეტალურად გაწერილი წესდების საჭიროებას. თუმცა, ბიზნეს საქმიანობის გარკვეულ ეტაპზე დამფუძნებლები აუცილებლად დგებიან თუნდაც მცირე უთანხმოების წინაშე, რომლის გადაწყვეტაც დამოუკიდებლად, ურთიერთშეთანხმებით არ შეუძლიათ. ამის გამო კი უწევთ სასამართლოსთვის/არბიტრაჟისთვის ან დავების გადაწყვეტის უფლებამოსილების მქონე სხვა სუბიექტისთვის მიმართვა, რაც ფინანსურ ხარჯებთან და დროის რესურსთან არის დაკავშირებული.

სწორედ ამიტომ, საჭიროა, თითოეულ ბიზნეს სუბიექტს დაფუძნების დღიდან ჰქონდეს დეტალურად გაწერილი წესდება. წესდებაში მოწესრიგებული უნდა იყოს ყველა შესაძლო საკითხი, რომელიც ბიზნესის მართვის ფარგლებში შეიძლება წარმოიშვას. ასეთი საკითხებია საწესდებო კაპიტალის ოდენობა, მისი შეტანის წესი, პარტნიორთა შორის წილების გადანაწილების საკითხი, ხმის მიცებისა და გადაწყვეტილების მიღების წესი, კრების მოწვევის წესი, პარტნიორთა გარიცხვის საფუძვლები, პარტნიორთა პასუხისმგებლობა, წილის გასხვისების წესი და სხვა მრავალი სამეწარმეო სამართლებრივი საკითხი, რომელთა წინასწარ განსაზღვრაც აუცილებელია ბიზნესის დაფუძნებამდე.

გაითვალისწინეთ, რომ თქვენი ბიზნესის შესაბამისი სამართლებრივი ფორმის შერჩევა და სწორად შედგენილი წესდება წარმოადგენს თქვენი მიზნის მიღწევის ერთ-ერთ მთავარ წინაპირობას. თუკი თქვენ არ დაუშვებთ შეცდომას და არ დაკარგავთ შესაძლებლობას, რომ სწორი სამართლებრივი გარანტიებით შედგენილი წესდებით, თქვენი სურვილის შესაბამისად მართოთ ბიზნესი, თქვენ დაზოგავთ დროსა და ძალისხმევას, შეინარჩუნებთ რეპუტაციას და თავიდან აირიდებთ სამომავლო უთანხმოებებსა და ზედმეტ ხარჯებს.

Read more